Parque Natural/ Serra da Enciña da Lastra

situacion:No extremo noreste da provincia de Ourense. Pertence á comarca de Valdeorras e linda coa provincia de León (comarca do Bierzo). As localidades principais máis próximas son O Barco de Valdeorras, Rubiá, A Ponte Domingo Flórez e Ponferrada.
xeoloxia:O rango altitudinal do espazo natural vai dos 380 m nas beiras do Sil ata os 1.089 m en Pena Tara, manténdose por enriba dos 800 m s.n.m. ao longo de toda a zona montañosa. O tramo do río Sil ao seu paso polo espazo natural (arredor de 4 km) vese afectado polo encoro de Penarrubia, que cobre unhas 137 ha, cunha capacidade de 12 Hm³.
flora:As especiais condicións de área, sometida a un importante déficit estival de precipitacións e caracterizada por importantísimos afloramentos calcarios, na que coinciden vales moi abrigados con paredóns de grande altura e verticalidade, propician a existencia dun excepcional plantel de comunidades vexetais de ámbito moi restrinxido ou que manteñen nestes lugares as súas mellores representacións en Galicia.
fauna:A pesar de que aínda non é ben coñecida, a fauna de invertebrados conta con varias especies de interese, algunhas delas incluídas no anexo II da Directiva hábitats. Entre estas destaca o ameazado cangrexo de río autóctono (Austrapotamobius pallipes) cuxa presenza en Galicia está reducida a moi poucos puntos das provincias de Lugo e Ourense. A vacaloura (Lucanus cervus), e o cerambícido (Cerambyx cerdo) entre os coleópteros e o ninfálido (Euphydryas aurinia) entre os lepidópteros, son insectos presentes na zona e amparados pola citada directiva.